Kuri uyu wa gatanu, taliki 26/06/2026, Agasozi k’ “Ibanga ry’amahoro” kakiriye abageze mu zabukuru basaga 1000, mu mwiherero wateguwe na Komisiyo y’ikenurabushyo ry’umuryango muri Diyosezi Gatolika ya Cyangugu. Baje baturutse mu ma paruwasi hafi ya yose ya Diyosezi.

Ni ubwa mbere Diyosezi ya Cyangugu yari ikoze umwiherero nk’uyu. Ubwitabire bwatweretse ko abageze mu zabukuru bafite inyota yo guhura n’urungano rwabo. Twawutekereje mu rwego rwo kwitegura umunsi mpuzamahanga w’abuzukuruje n’abageze mu zabukuru, uzahimbazwa ku nshuro ya 6 ku wa 26/07/2026, ku munsi mukuru w’abatagatifu Ana na Yowakimu, ababyeyi ba Bikira Mariya.

Umwiherero watangiranye na Penetensiya ku bari baharaye n’abazindutse, yatangiwe imbere y’ishusho ya Bikira Mariya Umwamikazi wa Kibeho. Hakurikiyeho ishapure y’ububabare burindwi bwa Bikira Mariya, twazirikanye tuzamuka agasozi k’Ibanga ry’amahoro. Ishapure yasojwe no kwiyambaza impuhwe z’Imana imbere y’ishusho ya Yezu Nyirimpuhwe. Bahawe inyigisho ngufi ku nsanganyamatsiko « No mu busaza bwe aba akera imbuto, aba acyuzuyemo ubuzima n’ubutohagire » (Za 91,15), yatanzwe na Padiri Thaddée NSENGUMUREMYI, Umuyobozi wa Komisiyo y’ikenurabushyo ry’umuryango. Inyigisho yakurikiwe no kuganirira mu matsinda, buri paruwasi ukwayo. Wabaye umwanya ukomeye wo kungurana ibitekerezo no guhanurana. Nyiricyubahiro Musenyeri Edouard SINAYOBYE, Umushumba wa Diyosezi yacu ya Cyangugu, niwe wayoboye Igitambo cya Misa cyasoje umwiherero, anagitangiramo umugisha w’abageze mu zabukuru.

Mu ijambo rye risoza, Umwepiskopi yashimiye abageze mu zabukuru bitabiriye ari benshi, ashima n’uruhare rwabo mu buzima bwa Kiliziya n’ubw’umuryango. Ati: “Buri muntu ugeze mu zabukuru ni agaseke gatwaye amateka maremare cyane. Imbere yanjye ndahabona uduseke twinshi, twuzuyemo ibintu by’agaciro… Buri wese ugeze mu zabukuru kandi ni igitabo kinini (encyclopedie) cyanditsemo amasomo y’ubuzima. Uwashaka kwiga ubuzima wese, yakegera icyo gitabo, ariko akaba azi uko bagisoma. Abato bagomba kumenya uko begera abakuru : udafite ikinyabupfura ntiyamenya gusoma ibiri mu buzima bw’usheshe akanguhe”. Yasoje abashimira ibitekerezo batanze, abizeza ko Kiliziya izakomeza kubatega amatwi no kubashyigira, kugira ngo bazakomeze kwera imbuto mu busaza bwabo. Ibyo abifuriza yabihiniye mu nteruro 3:

• “Muzarambe kugeza igihe Imana izashakira;
• Musaze mutanduranya, musazane ibyishimo n’umutima mwiza;
• Musazire mu Mana: izabukuru n’isengesho bibe pata na rugi, maze abazaza nyuma yanyu bajye babavuga ibigwi by’ukwemera.”

Bahawe urwibutso rw’isengesho ry’abageze mu zabukuru, isengesho bavugiye hamwe mbere yo guhabwa umugisha usoza.

Bamwe muri bitabiriye bafashe ijambo bagaragaza uko babona izabukuru n’uruhare rwaryo mu guhamya ukwemera no kumurikira sosiyete. Bashimye cyane ko bahawe uburyo bwo guhura nk’urungano. Mu byifuzo bagaragaje harimo: gukora umwiherero nk’uyu buri mwaka ku Ibanga ry’amahoro, guha imbaraga amatsinda abahuza mu maparuwasi, gukora Noveni itegura umunsi mukuru w’abuzukuruje n’abageze mu zabukuru, guhimbariza uyu munsi mukuru muri buri Paruwasi kandi bagakora ubusabane nyuma ya Misa.

Cyangugu, ku wa 28/06/2026

Padiri Thaddée NSENGUMUREMYI,

Umuyobozi wa Komisiyo y’ikenurabushyo ry’umuryango muri Diyosezi Gatolika ya Cyangugu.