AMASOMO:

Dn 7, 13-14;

Ps 92;

Ap 1, 5-8;

Jn 18, 33b-37.

N’ubwo bwose ku isi ibihugu bisigaranye ingoma za cyami bibarirwa ku mitwe y’intoki, icyo umuntu yakwihutira kwibaza ni ukumenya aho ubwami bwa Yezu butandukaniye n’ubw’abandi bami b’iyi si ari abo tuzi bakiriho cyangwa twumvise babayeho
. Ni byinshi abami bo ku iyi si bamenyekaniraho: Nko kugira ububasha bukomeye ari ku bintu n’abantu, icyubahiro n’ubudahangarwa bavukana, ngo ndetse bamwe bavukanaga n’imbuto, kubahwa no gutinywa na bose, kugaragirwa no kurindwa bikomeye… Ese ubwami bwa Yezu bwo bwaba buteye gute?

Ni byo koko Yezu Kristu ni umwami

. Ubwo Pilato yamubazaga niba koko ari Umwami, Yezu yamusubije atazuyaje ati : ‘‘Urabyivugiye, ndi Umwami’’. Ariko Yezu yari amaze gusobanura iby’ubwami bwe kuko yaramaze kwivugira ati :“Ingoma yanjye si iyo kuri iy’isi; iyo ingoma yanjye ikiza kuba iyo kuri iyi si, abantu banjye baba bandwanyeho, kugirango ntagabizwa abayahudi”(Jn 18, 36-37).

Ubundi mu gihe cya Yezu na mbere ze, abami b’ibihugu babaga bambaye ikamba rya zahabu (Zab 21,4; Za 9,16). Ariko Yezu we yatamirijwe ikamba ry’amahwa. Abasirikari b’Abaromani batamiriza Yezu ikizingo cy’amahwa bamuhoraga ko yiyise umwami kandi atari we. Nyamara ahubwo uko kumutamiriza ikizingo cy’amahwa byatumye agaragaza ko ubwami bwe atari ubwo kuri iyi si. Ubwami bwa Yezu ntabwo ari burya buharanira ikuzo ry’ino si ku nabi n’ineza.

Abami bose aho bava bakagera bagiraga intebe ya cyami, nk’ikimenyetso cy’ububasha. Yezu we intebe ye ya cyami ni umusaraba. Ibyegera bye ni bya bisambo bibiri, nk’uko yari yarivugiyengo “Sinazanjywe n’intungane, ahubwo nazanywe n’abanyabyaha”.

Aho ubwami bwa Yezu bwongera gutandukanira n’ubwami bw’iyi si, ni uko we yatsinde atagombye gukoresha intwaro. Abami b’iyi si, kugirango ingoma zabo zirambe cyangwa babashe gukiza ababo babanza kwikiza abo bita abanzi. Intego y’abami b’iyi si ni uko ushaka amahoro ategura intambara. Abami b’iyi si n’iyo batanze, hagomba kuboneka imbaga bisasira, byanashoboka hakaba n’iyo biyorosa. Nyamara Yezu we yahisemo kwitangira intama ze kugirango zigire ubugingo.

Usibye no ku babatijwe, ku Banyarwanda bose umunsi mukuru wa Kristu Umwami, ni umunsi ukomeye cyane mu mateka y’iki gihugu
. Hari ku cyumweru cyo ku wa 27 ukwakira 1946, ubwo umwami Mutara Rudahigwa yaturaga Umwami Yezu Urwanda n’Abanyarwanda. Dore amwe mu magambo agize isengesho umwami yavuze : “Nyagasani Yezu, Mwami w’abantu bose n’uw’imiryango yose; wowe hamwe n’Umubyeyi wawe Bikira Mariya, Umugabekazi w’ijuru n’isi. Jyewe Mutara Karoli Lewo Petero Rudahigwa, ndapfukamye ngo nemeze ko ari mwe Bagenga b’inteko b’u Rwanda, mukagomba no kutubera umuzi ushingiweho n’ubutegetsi bwarwo n’ingoma yarwo

. …Abagabo barutuyemo, ubahe umutima w’ubudacogora mu ishyaka barurwanira ryo kurushyira imbere no kurukomezamo amahoro wazaniye isi yose….Abagore ubahe umutima w’ubudahinyuka, barubere mu nteko barutegeye urugori, barere neza abana waduhereye kurugwiza…”
Ese nk’Abanyarwanda tujya tuzirikana ko turi ihanga ryatuwe Kristu Umwami? Ku babatijwe by’umwihariko, natwe muri Batisimu twagizwe abami, ariko atari ba bandi b’iyi si, ahubwo babandi barangwa no kwicisha bugufi, bamwe barangwa no kwitangira bagenzi babo. Ibi kubivuga biroroshye, nyamara kubishyira mu ngiro birakomeye. Nituza guhabwa Yezu, tuze kumusaba aduhe imbaraga maze tubashe kuba abahamya nyabo b’ingoma ye muri iyi si ya none. Amen

Padiri Fidèle NSHIMIYIMANA

Umurezi mu Iseminari Nto ya Mutagatifu Aloys