Byakusanyijwe na Mme Annonciate Muhimpundu

Kuri uyu wa 24 Ugushyingo 2025, kuri Paruwasi Mashyuza muri Diyosezi Gatolika ya Cyangugu, mu Murenge wa Muganza, Akarere ka Rusizi, habereye amahugurwa y’umunsi umwe yahawe abakangurambaga b’iterambere n’imibereho myiza y’abaturage (Parasocials). Aba bakangurambaga mirongo itatu na batatu bakaba bahagarariye imidugudu 30 n’utugari 3 bigize umurenge wa Muganza. Ni amahugurwa yatanzwe na Bwana Jean D’Amour URAMUTSE, waturutse mu muryango wa NUDOR. Yari afatanyije na Mme Annonciate MUHIMPUNDU, Umufashamyumvire muri CARITAS ya Diyosezi ya Cyangugu na Bwana HABIMANA Lucien, Umukozi w‘Umurenge ushinzwe ubuzima.

Aba bakangurambaga bahuguwe ku iterambere ridaheza rishingiye ku muryango. Hibanzwe ku bwoko bw’ubumuga, bimwe mu bibutera n’uburyo bwo kubyirinda, ibiranga umuntu ufite ubumuga n’uburyo twamufasha. Bahuguwe kandi ku gatabo k’umuryango (Logbook) n’imikoreshereze yako. Aka gatabo bakakifashisha mu kubarura no gukurikirana abafite ubumuga bari mu midugudu yabo.

Nyuma y’amahugurwa ubakuriye yavuze ijambo ryo gushimira Caritas ya Diyosezi n’umuterankunga NUDOR. Yashimangiye ko bagiye gushyira mu bikorwa ibyo bigishijwe . Iyi gahunda itangirijwe mu Murenge wa Muganza nk’agace k’icyitegererezo (zone Pilote) kuko ari ho higanje abafite ubumuga butandukanye kandi bakeneye gukurikiranwa no kwitabwaho.

Muri urwo rwego kandi rw’ubukangurambaga ku kudaheza abafite ubumuga, kuri uyu munsi, mu cyumba cy’inama cya Paruwasi ya Mashyuza nanone, habaye amahugurwa y’umunsi umwe yahuje ababyeyi b’abana bafite ubumuga bageze ku 100 aho umugore n’umugabo bari bazanye kandi banicaranye. Ni amahugurwa yateguwe ku bufatanye hagati ya Caritas Cyangugu na NUDOR. Uyu muryango ukaba wai uhagarariwe na Jean Paul SEKAREMA na Marie Louise MANIRAKIZA.

Abitabiriye amahugurwa bigishijwe ku burere buboneye bw’umwana ufite ubumuga mu muryango (Positive Parenting). Bityo, ababyeyi bombi bibutswa ko bagomba kwita ku mwana bafatanyije. Ababyeyi basabwe kumva ko nta n’umwe ugomba gutererana undi cyangwa ngo ahunge urugo kubera ubumuga bw’umwana we.  Nyuma yo kwigishwa, batanze ubuhamya bunyuranye bufasha abandi, habonekamo abari barataye ingo biyemeje kugaruka. Hari kandi n’abatarashyingiranywe biyemeje kuzasezerana imbere y’amategeko.