Kuri uyu wa kane tariki ya 19/01/2017, kuri Paruwasi Katedrali ya Cyangugu, abanyeshuri biga mu mashuri yisumbuye bakoze umunsi mukuru wo gusezeranaho bise “Bye-bye vacances”

.

Ni umunsi waranzwe n’ibyishimo byinshi ndetse n’ubusabane ku banyeshuri biteguraga gusubira ku masomo!

Nyuma yo kuganirizwa na Padiri Ushinzwe urubyiruko muri iyi paruwasi, abanyeshuri bakiriye Padiri Emmanuel KALINIJABO uhagarariye Komisiyo ya Diyosezi ishinzwe uburezi mu mashuri Gatolika maze maze abaha impanuro zikubiyemo impamba ibaherekeza ku ishuri kandi abashishikariza kuzarangwa n’ubukristu mu bigo bigaho bagaragara mu miryango ya Agisiyo Gatolika inyuranye.

Mu gusoza uyu munsi mukuru, abanyeshuri bagaragaje ibyishimo bibari ku mutima; bityo bashimira ubuyobozi bwa Diyosezi n’ubwa paruwasi uburyo bakomeje gushyira umutima n’imbaraga mu ikenurabushyo ry’urubyiruko muri Diyosezi yacu. Bishimiye kandi ibiganiro bahawe, maze na bo bafata ingamba zo kubigira ibyabo. Muri izi ngamba twavuga nko kujya mu miryango ya Agisiyo Gatolika ku bigo bigaho, kujya muri Korali n’amatsinda yo gusenga no gukora ibikorwa by’urukundo cyane cyane mu basheshe akanguhe no gukorera ubutumwa mu rubyiruko rudasenga rwatwawe n’isi.

Ibirori by’uyu byari mu rwego rw’amahuriro y’abanyeshuri bari mu biruhuko akorwa buri wa kabiri kuva ku itariki ya 08/11/2016
. Amahuriro atangira saa mbiri za mu gitondo (8h00) agasoza saa munani n’igice z’amanywa (14h00)
.

Muri aya mahuriro yose abanyeshuri bahawe inyigisho zitandukanye zirimo kubashishikariza gukunda isengesho no kubahiriza umunsi w’Imana, gukira ibikomere no kubohoka ku nabi no ku mateka mabi, kubabarira, guhabwa kenshi amasakaramentu cyane cyane isakaramentu ry’imbabazi, kumvira ababyeyi no kutiyandarika tutibagiwe no gukunda umurimo..

. Aya mahuriro akaba yaragiye yitabirwa n’abanyeshuri barenga magana ane na mirongo itanu (450).