Ingingoremezo: « Dore umugati w’ubugingo ».Isomo rya 1: Ivugururamategeko 8,2-3.14b-16a. Zaburi 147, 12-13,14-15, 19-20. Isomo rya 2: 1Korinti10, 16-17. Ivanjili: Yohani 6,51-58

Bana b’Imana, Dore umugati w’ubugingo! None kuri iki cyumweru turahimbaza umunsi mukuru w’Isakramentu ritagatifu ry’Umubiri n’Amaraso bya Kristu. Uyu munsi witwa “Fête-Dieu, Imana yakoze ibirori. Nk’uko tubimenyereye no muyindi minsi mikuru isanzwe mu bukwe dutondagura inshinga ebyiri “kurya no kunywa” n’Imana nayo kugira ngo yuzurane n’abantu mu munsi mukuru yegera abantu igira ngo ibakize, igakoresha izo nshinga mu bimenyetso by’ifunguro ry’umubiri:Umugati na Divayi kugira ngo yerekeze imitima y’abantu ku ifunguro rya roho umubiri n’amaraso bya Kristu. Ngiyi Misa duhimbaza ishushanya ibirori Imana idukorera hano ku isi bitwerekeza ku birori by’ijuru. Gatigisimu ya Kiliziya Gatolika itwibutsa ko Ukaristiya ari isakramentu ririmo Yezu Kristu ubwe rwose n’umubiri we n’amaraso ye mu bimenyetso by’umugati na Divayi akatubera icyarimwe igitambo, ifunguro n’inshuti tubana. Aya magambo 3 : igitambo, ifunguro n’inshuti arakomeye nk’aturangira umugati w’ubugingo tugiye kuyazirikanaho mu nshinga 3: Kugaburira, Gusangira no Gushimira.

Inshinga ya 1: Kugaburira: Yezu yitanzeho igitambo ngo aducungure ubwo yaremye Ukaristiya kuwa kane mutagatifu araye ari budupfire ubwo yavugaga ati iki ni umubiri wanjye iki ni amaraso yanjye ; hari ubwoko 4 bw’ifunguro ryari risanzwe rikoreshwa mu bayisraheli bwagenuraga Ukaristiya: Manu, ifi, umugati na Divayi.  1°Manu Imana yagaburiye abayisraheli nk’uko twabizirikanye mu isomo rya mbere ari byo Musa ari kwibutsa abayisraheli ati  Uhoraho yagucishije bugufi, atuma wicwa n’inzara maze akugaburira Manu wari utazi n’abasokuruza bawe batigeze bamenya ibyo ari ukugira ngo akumenyeshe ko umuntu adatungwa n’umugati gusa ko ahubwo atungwa n’ijambo ryose riturutse mu kanwa k’Uhoraho. 2°Ifi:  “Muri icyo gihe Yezu amaze kugaburira imbaga imigati itanu n’amafi abiri aravuga ati nijye mugati muzima wamanutse mu ijuru” Abakristu ba mbere bakunze gukoresha hagati yabo ifunguro ry’umugati n’ifi, bigana ahavugwa mu mavanjili (Yh 21, 1-14). Umunsi umwe baje kurabukwa ko ijambo ry’ikigereki “IKhThUS”: Ictus (poisson, ifi) ritanga inyuguti zitangira z’interuro: “Iesous Khristos Theou Uios Soter”: Jesus Christ, Fils de Dieu, Sauveur: Yezu Kristu, Umwana w’Imana, Umucunguzi

. Guhera ubwo iri jambo” IKhThUS”: ifi, rihinduka ikimenyetso cy’ibanga cyo kumenyana hagati yabo mu gihe cy’itotezwa. Ifi ni ikimenyetso cya Yezu, amafi ashushanya abakristu. 3°Umugati nk’ifunguro ryo ku isi ryari risanzwe rikoreshwa mu bayisraheli, Yezu nawe akawukoresha agaburira abamukurikiye kugirango abaganishe ku Mugati utanga ubugingo ariwe ubwe. 4°Divayi yavaga ku mbuto y’imizabibu, umuzabibu ushushanya umuryango w’Imana na Divayi ikimenyetso cy’ibyishimo aho Yezu yemera kumena amaraso ye kugirango dukire, tugire ibyishimo, ubumwe nk’uko na Pawulo yabitwibukije mu isomo rya mbere ati mbese inkongoro y’umugisha tunyweraho dushimira Imana si ugusangira amaraso ya Kristu? N’umugati tumanyurira hamwe si ugusangira umubiri wa Krsitu? Bimwe mu bihangano (oeuvres) bya Mutagatifu Tomasi w’Akwino kuri Ukaristiya harimo: Huguka uririmbe (Tantum ergo), Rata Siyoni ndetse n’ijambo rikomeye akoresha asobanura « consécration » ryitwa “transubstantiantion rigasobanura urwo rugendo cyangwa ubwo buryo umugati na Divayi bihinduka umubiri n’amaraso bya Kristu,  Tomasi yakoresheje ubumenyi buhambaye bwa filosofiya (“Philosophie de métaphysique)  mu kinyejena cya 13 ati  « hirya y’ibigaragara shaka ukuri bishushanya uhasanga inyamibwa ». Ibi bisobanura bya Tomasi kuri iri jambo rya « transubstantiantion yerekana Yezu uri mu Ukaristiya  byafashije Inama nkuru ya Trento mu kinyejana cya 16 “contre la Réforme”, iyi nama yemeza ko Yezu ari mu Ukaristiya rwose umubiri n’amaraso bye: Présence réelle de Jésus dans l’Eucharistie. Yezu rero mu Misa aratugaburira Ukaristiya, umugati w’ubugingo,  ni ukimenyetso cy’Urukundo yadukunze.

Inshinga ya 2: Gusangira: Yezu witanga kubera urukundo akihindura ifunguro agira ngo natwe abasangira twunge ubumwe. Kimwe mu bibangamira ubumwe mu gusangira ni umururumba, kugaya, ngo ibiryo ni bike, simpaga! Nibwo usanga ingayi ziri kwijujuta, wa mugani ukabuzurizwaho ngo abasangiye ubusa bitana ibisambo. Umwana ugira umururumba ngo simpaga ni bike, iyo yumvise mugenzi we uje amugana aho gusangira nawe atangira kubihisha hari na benshi uzasanga mu bukwe bari kwihereza byinshi bagacura abandi kubera ifemba nyamara imfura ni iyo musangira ntigucure nibwo uzasanga wa mwana utahaze wagize umururumba arasuzugura ababyeyi ari kwitwara nabi kuri bagenzi be no ku babyeyi

. Ukaristiya ntabwo tuyirya nk’uko dushaka guhaga ibishyimbo n’ibijumba aka wa mwana wabwiye Padiri ati kubera ko uri inshuti yo murugo nanjye nimpabwa amasakramentu nujya ungeraho ugiye kumpaza njye ntukajye umpa kamwe ujye unyorera nyinshi nihagire! Mu gihe ibyo bijumba n’ibyo bishyimbo ari ifunguro rihaza ku mubiri, Ukaristiya yo ni ifunguro rya Roho, ridutera imbaraga za roho tukagira ibyishimo n’amahoro ni umuti n’urukingo rw’ikibi yego wongera gucumura wayihawe ariko igufasha kurwana n’ikibi aka ba basirikare babonaga Umukuru wabo ajya mu Misa akanahazwa ariko agakomeza abarundaho amategeko abakandamiza ntabahe ubuhumekero nuko umusirikare umwe abonye ashikamiwe aramubaza ati Nyakubahwa kuki udutegeka ukadukandamiza kandi ngo uhazwa, ugahabwa Yezu ? Commandant aramusubiza ati tekereza noneho ndamutse ndahazwa uko nabagenzereza! Mukristu burya Yezu duhabwa agenda atuvugurura buhorobuhoro, Ukaristiya ntabwo ari igihembo cy’abakora neza gusa, intungane ahubwo ni impamba y’abajya mu ijuru, umugati w’abamalayika, umugati w’abana b’Imana bityo buri mukristu aharanira kuyihabwa neza yisukuye yahawe Penetesiya yitunganyije kugira ngo bitamera nka ya mazi basuka ku ibuye. Iyo utaba umukristu wari kuba ugeze he? Gusangira “communion” ni uguhaga ni ukunyurwa ni ibyishimo, ukanyurwa na duke tw’ineza kuko Ukaristiya ni wa muti udakorera ubwinshi bityo nta mururumba urangwa mu bana b’Imana kuko Ukaristiya itwunga na Yezu kandi ikatwunga n’abavandimwe bacu, “ ni iskramentu ry’ubumwe.

Inshinga 3: Gushimira: Usibye imbwa ushobora kurangiza kugaburira igahita ikandagira isahani ariko umwana warezwe neza iyo umubyeyi arangije kumugaburira aramushimira ati murakoze, hari abantu badashimira, gushimira ni ngombwa mu buzima. Iri jambo murakoze ni cya gihe twahawe Yezu  tukagaruka kumushimira. Ubundi Ukaristiya bivuga gushimira. Habaho Hositiya cya kimenyetso cy’umugati kiri muri sakristiya dutegura mu Misa naho Ukaristiya Eucharistia (mu kigereki) : action de grâce: gushimira, yahindutse Yezu (muri Consécration) iri kuri Altari no muri Tabernakolo. Misa rero nk’ibirori yitwa na none Igitambo cy’Ukaristiya, icyo gikorwa cyo gushimira Imana twumva ijambo ryayo, tugatura Igitambo cy’Ukaristiya, tugasangira umubiri n’amaraso bya Kristu, iyo duhawe umugisha usoza ngo tujye mu butumwa ni ukujya gusangiza abandi ibyiza Yezu yadukoreye, ariko nk’inshuti yacu magara twagiranye igihango twongera kugaruka tukamushimira muri rya sengesho ryo “gushengerera  adoration” niho twongera kugaragariza Yezu ubucuti bwacu nka ya mvugo igira iti umwana utaganiriye na Se ntamenya ibyo Sekuru yasize avuze. Mu gihe gisanzwe corona itaratudurumbanya hari abakristu baherukaga mu Kiliziya ku cyumweru abandi bakanaza ku cyumweru kubera itegeko ngo abandi batabareba nabi, abandi bakajya gusenga ari uko babyibukijwe, muvandimwe niba nta mwanya w’umwihariko wawe ku giti cyawe ugenera Yezu ngo ugaruka muganire mwembi mwenyine nta bucuti buri aho, biragoye ko wasobanukirwa n’Ukaristiya, biragoye ko watera imbere mu bukristu niba nta mubano wihariye ugirana na Yezu aribyo mutagatifu Yohani Mariya Vianney yavugaga ati Yezu ari muri Ukaristiya ndamureba nawe akandeba kuko mba nizeye ko ahari. Nawe muntu utemera ko Yezu ari muri Ukaristiya, hagomba imyitozo impande zose, uba umucuzi uri gucura “c’est en forgeant qu’on devient forgéron” kandi ngo “on ne comprend la liturgie qu’en y prenant part” wumva neza iby’Imana, Misa, Ukaristiya ujya mu Misa, usenga, ushengerera. Mukristu rero ntucike intege n’ubwo waba utarasobanukirwa komeza uko ukora iyo myitozo myinshi yo gusenga uyihate,Yezu arakureba, Yezu arahari, Yezu arakuruzi, Yezu igitambo, Yezu funguro, Yezu nshuti yacu aradukunda yifuza kugumana natwe. Yezu m’Ukaristiya, Uragasingizwa ! Icyumweru cyiza !

Padiri MASUMBUKO Ladislas wa Diyosezi ya Cyangugu.