Ingingoremezo: “Ntimugakuke umutima».

Isomo rya mbere: Intumwa 6,1-7.

Zaburi 33 (32), 1.2b-3a,4-5, 18-19.

Isomo rya 2: 1 Petero 2, 4-9

Ivanjili: Yohani 14, 1-12

Bana b’Imana, amasomo y’iki cyumweru araduhumuriza “ntimugakuke umutima”. Ukwemera nk’igisubizo cy’ubwoba, ukwemera  gushingiye ku mubano wacu n’Imana n’umwana wayo Yezu Kristu uko kwemera kuduhumuriza, niko kutugeza aheza Yezu agiye kudutegurira. Mu isomo rya mbere, turumva uburyo Kiliziya mu ntangiriro yagiye ikemura ibibazo by’ukwemera: mu itorwa ry’abadiyakoni barindwi bari bashinzwe cyane umurimo wo kugabura; “diakonos” ni ijambo ry’ikigereki, rivuga serviteur, umugaragu, umuhereza, umudiyakoni ni umuntu wita ku bandi akabafasha akabitangira; ni umurimo wa ngombwa wa kiliziya wo gufasha abana bayo, bituma ijambo ry’Imana rikomeza gukwira hose, umubare w’abigishwa urushaho kwiyongera ndetse n’abaherezabitambo benshi bayoboka ukwemera

. Ese njyewe witwa umukristu mu Kiliziya, mu ikoraniro ngiramo umurimo, mfasha abandi nte mu buzima bwa roho n’ubw’umubiri mu gutera imbere? Zaburi iraturarikira gushyira amizero yacu muri Uhoraho “Uhoraho ineza yawe iraduhoreho nk’uko amizero yacu agushingiyeho.” Petero we mu isomo rya kabiri aradushishikariza kwegera Nyagasani ibuye rizima Yezu Kristu, nibwo tuzaba ingirakamaro; “turi indobanure, turi ubwoko bwatoranyijwe, imbaga y’abaherezabitambo, ihanga ritagatifu, umuryango w’Imana” Mbega amahirwe yo kuba turi mu biganza by’Imana ikagira n’ibyo idushinga!  Ni nabyo Yezu aturarikira uyu munsi aduhumuriza, iyi vanjili ije ikurikira Yezu amaze koza ibirenge by’intumwa ze, wa  Yezu umudiyakoni mukuru umugaragu, ikabanziriza ububabare n’urupfu bye, Yezu rero ugiye kuva kuri iyi si ngo asange Se arakomeza abigishwa be bafite ubwoba bwo gusigara bonyine ati “ ntimugakuke umutima”. Mu migenzo itatu mbonezamana: ukwemera, ukwizera n’urukundo yose irajyana kandi iruzuzanya tugiye rero kuvuga ku kwemera ariho hashingiye igisubizo cy’ubwoba ku masomo y’uyu munsi, mu bisubizo bibiri: “nimwemere Imana nanjye munyemere” na “nijye nzira ukuri n’ubugingo”.

Igisubizo cya mbere: nimwemere Imana nanjye munyemere: Mu ndangakwemera ya Kiliziya gatorika “credo” mu ngingo ya mbere: twemera Imana Data ushobora byose waremye ijuru n’isi, ibiboneka n’ibitaboneka. None rero tubaye twemera gusa ibyo twabonye, twakozeho, ya Mana itagaragara ubwo twayemera? Ukwemera ni ubuyoboke bw’umuntuku giti cye agana Imana, ni impano Imana yihera buri wese ku buntu bwayo ikagufasha kwirundumurira muri Yo. Ukwemera ni ugutega amatwi ibyo Imana itubwira, ni ugukurikira inzira za yo. Ukwemera ni ugufata inzira utazi neza aho ikwerekeza nk’umukurambere wacu Abrahamu: Uhoraho ati wimuke uve mu gihugu cyawe, mu muryango wawe, ujye mu gihugu nzakwereka (Intg12, 1). Ibyo utareba neza ariko wizeye ukuri kwabyo bitewe n’uwabikubwiye twabigereranya na wa mwana wazamutse ajya muri “étage” asiga ababyeyi be hasi, agezeyo arakubagana adurumbanyayo amasinga, umuriro uza kwaka muri ya etage umwotsi uracumbeka cyane, umwana ntiyaba akibona hasi nuko Papa abwira umwana ngo nasimbuke aramusama, umwana aramusubiza ati Papa sindi kubona hasi kandi nawe sinkuruzi nuko Papa we ati simbuka njye ndakuruzi! Bavandimwe ukwemera kutujyana aho tutazi, Imana umubyeyi wacu we aba aturuzi buri gihe. Imyanya y’ijuru Yezu agiye kudutegurira, ijuru n’ubwo tutaribona ariko twemera ko ribaho kuko Yezu ntiyatubeshya arifuza kugumana natwe aho heza, icyo dusabwa ni ukwemera Imana n’umwana wayo Yezu tukagaburira ukwemera kwacu n’ibyanditswe bitagatifu, tugahabwa neza amasakramentu, dukora neza, ibikorwa by’urukundo, nta kuba umukristu ku izina ahubwo ukwemera kukajyana n’ingero nziza zihamya uko tubanye n’Imana twemera.

Igisubizo cya kabiri: nijye nzira n’ukuri n’ubugingo: Iki ni igisubizo Yezu yahaye Tomasi ubwo yarari kumusiganuza: ninjye nzira n’ukuri n’ubugingo ntawe ugera kuri Data atanyuzeho: ntahandi umukiro wacu unyura usibye muri Kiliziya ya Kristu: “en dehors de l’Eglise point de salut”, ni mu izina rya Yezu dukirizwamo, “umwemera wese aronka imbabazi z’ibyaha abikesha ububasha bw’izina rye” (Int 10, 43), muri Yezu niho hari umukiro gusa: “en dehors de Jésus point de salut”. Iyo wibeshye ukanyura ahandi cyangwa ukiringira amaboko yawe cyangwa imbaraga z’isi, Yezu ukamusiga uragwa, uratakara, bya byicaro Yezu agiye kudutegurira wareba nabi ukazaburamo umwanya

. Umunsi umwe, umugabo w’umucuruzi wasengaga cyane yagiye mu Ngoro asaba Yezu imodoka yo kujya akoresha imirimo ye ngo irusheho gutera imbere nuko Yezu aramubwira ati ndayiguhaye ariko umwanya w’imbere nijye uzajya uwicaramo, wa mugabo bakorana iryo sezerano na Yezu, ya modoko arayibona. Ku munsi wa mbere abangura ya modoka ye agiye mu kazi nuko ahura na Yezu ku nzira wagendaga n’amaguru amusaba rifuti nk’uko babisezeranye yicaza Yezu imbere baragenda, yigiye imbere gato ahura n’umukobwa amusaba rifuti, wa mugabo ubwenge burahindukira abonye uko uwo mukobwa yari yishyizeho neza yumva atamusiga nuko asaba Yezu kujya kwicara mu mwanya w’imizigo ngo abone uko yiganirira n’uwo mukobwa, wa mukobwa yicara imbere Yezu aramwimukira, bigiye imbere gato wa mugabo abona aho bari bari gusahura amabuye y’agaciro nawe ashaka gusahuraho nuko abwira Yezu ati Yezu ube uvuyemo mbaze mpakire ay’amabuye azambeshaho mu misi iri imbere, wowe ukomeze ugende n’amaguru nzongera kuguha umunyenga ubutaha, ubwo hari mu mvura y’amahindu Yezu agenda anyagirwa nuko wa mugabo uko yagapakiye ya mabuye n’uburemere bwinshi kandi bari kugenda baganira na wa mukobwa amurangaza, baza gukora impanuka imodoka iba ubushingwe cyakora Yezu wagenda n’amaguru aba ari we ugaruka kubatabara!

Muvandimwe kwemera Yezu nta mashyengo abamo, iyo wamuhaye karibu, wirinda kumuvanga n’abantu n’ibintu, kwimura Yezu ukimika abagore, ukimika abagabo, indaya n’abacancuro, ukamurutisha ibintu n’abantu kandi ariwe wabiguhaye byose, uko ni ukurindagira no kwitesha ijuru. Ikizwi cyo ni uko nta buzima wagira utari muri Yezu, niwe nzira, ukuri n’ubugingo ntiwakandagira muri rya juru utari kumwe nawe, ntiwakwicara muri ya myanya utamwemera. Muvandimwe, ongera wirebe niba nta bantu wasimbuje Yezu mu buzima bwawe, niba nta bintu uhihibikanira amanywa n’ijoro ukaba utakibona n’akanya ko gusenga, kumva ijambo ry’Imana, ugaha Imana iminota mike kandi yo iguha amasaha yose! Muvandimwe, ubwato bwawe, imodoka yawe, inzu yawe, icyumba cyawe, umuntima wawe Yezu ahafite uwuhe mwanya?  Aracyari imbere cyangwa ntunakizi ko abaho? Imbere y’amagorwa, ubwoba, agahinda, imibabaro inzara, ubukene uburwayi,imiyaga n’ibiza, imbere ya coronaviurus idukakabije ikatubuza kwinyegambura nitwemere Imana n’umwana wayo Yezu,niwe nzira ukuri n’ubugingo. N’ubwo abantu n’ibintu byagushiraho, humura Yezu we ntakuvaho,niwe gusa musigarana kandi we ntashobora kugusiga,aragutabara akaguhumuriza,wabibona cyangwa utabibona we arakuruzi, komeza inzira y’ukwemera umusanga udacika intege, utadohoka, Nyagasani muri kumwe. Nimugire icyumweru cyiza!

Padiri MASUMBUKO Ladislas wa Diyosezi ya Cyangugu.