Umushumba wa Diyosezi ya Kabgayi Mgr Smaragde MBONYINTEGE yakiranye ibyishimo urubyiruko rwa Diyosezi ya CYANGUGU rwamusuye kuwa gatandatu tariki ya 4/01/2020

Mu kiganiro bagiranyi yarushimiye uruhare rugira mu iyogezabutumwa ry’urubyiruko! Yagize ati: abajene b’i CYANGUGU nta muntu utabazi muri forum! Muzwiho kwitabira kurusha abandi, muzwiho gushyuha no gushyushya abandi, yongeraho ati no kurimba muri abambere n’ikimenyimenyi uko mwambaye uyu munsi birisobanuye!

Yabashimye kuri urwo rugero rwiza mu iyogezabutumwa ry’urubyiruko batanga anabashimira ubwitange badahwema kugaragaza.

Mu butumwa yabahaye yabasabye guhorana ubutwali mu rugamba rwo guhamya ukwemera, kurangwa n’ishyaka ryo kwamamaza inkuru nziza no kuyitangira ndetse no kurangwa n’ishyaka ryo kubohora abo Shitani yagize imbata. Yasabye urubyiruko gusoma ibitabo bibafasha gusobanukirwa n’inyigisho za Kiliziya by’umwihariko igitabo cya Padiri AMERICA Victor cyitwa NZI UWO NEMEYE

Musenyeri yakomeje kubana n’urubyiruko no mu gitaramo cyayobowe na Orchestre Special Mood ndetse na Chorale De Gloria Dei akaba yashimye intambwe urubyiruko rwa Diyosezi ya CYANGUGU rumaze gutera mu iterambere anashima uburyo basusurukije abakristu ba Diyosezi ya KABGAYI! Yagize ati: Murashyushye, murizihirwa ariko musige mushyuhije n’abanjye kandi mubatoze kwizihirwa!

Ku ruhande rw’urubyiruko kubonana n’Umwepiskopi wa KABGAYI byabashimishije cyane.Bisanzuye, bagera n’aho bamubwira ko bahangayikishijwe cyane n’uko Diyosezi ya CYANGUGU idafite Umwepiskopi

. Bamubajije igihe Diyosezi ya CYANGUGU izabonera Umwepiskopi abasubiza ko icyo kibazo gihangayikishije Kiliziya yose ndetse ko nawe ubwe yabibajije intumwa ya Papa mu RWANDA . Yasabye urubyiruko gutegereza rwihanganye.

Abajene bashimiye cyane Nyiricyubahiro MUSENYERI Smaragde MBONYINTEGE umwanya yabahaye, akabaganiriza, akabatega amatwi, agataramana nabo kandi akabaha umugisha!

Padiri Emmanuel UWINGABIRE

Omoniye w’urubyiruko muri Diyosezi ya CYANGUGU.