Abajene ba Diyosezi ya Cyangugu guhera 03-05/01/2020 bari mu rugendo muri Diyosezi ya Kabgayi. Ni muri gahunda yo kunoza umubano na Diyosezi ya KABGAYI yari yasuye muri  2017  iya Cyangugu ;Ni muri gahunda kandi y’ukwezi kw’iyogezabutumwa ry’urubyiruko aho rushishikarizwa  guhaguruka rukajya mu butumwa!

Uyu munsi hakozwe urugendo nyobokamana ku butaka butagatifu bwa MBARE aho Mutagatifu YOHANI PAHULO II yasomeye Missa akanatangira isakaramentu ry’ubusaseridoti 1990.

Aha i Mbare hagizwe umurwa w’urubyiruko dore ko MUTAGATIFU YOHANI PAHULO WA II ari umurinzi w’amahuriro y’urubyiruko ku isi!

UBUTUMWA URUBYIRUKO RWAHEREWE I MBARE NI UBUHE?

Urubyiruko rwahawe ubutumwa Mutagatifu Papa Yohani wa II yatuzaniye ubwo yasuraga u Rwanda

. Yasabye urubyiruko kudahora mu marira ahubwo bakigirira icyizere, urubyiruko ntirukwiye kwiheba ahubwo rugomba kwiyumvamo ko ari amizero y’isi! Buri mujene aho kuganya akavuga ati: « Ninjye mizero ya Kiliziya , ninjye mizero y’isi »! Mutagatifu Yohani Pahulo wa Kabiri ashishikariza urubyiruko kutumva ko ibibazo byabatwara ngo bibatere kuba abanyabibazo cyangwa guhinduka ikibazo ahubwo adushishikariza guhinduka igisubizo! U Rwanda ntirugomba guhindurwa urw’ibibazo ahubwo rugomba guhindurwa urw’ibisubizo  . Buri wese aharanira kuba igisubizo aho kuba ikibazo. «Tube igisubizo aho duherereye hose! Kiliziya idutegerejeho kuyibera igisubizo ».

Aho i MBARE  urubyiruko rwa Diyosezi ya Cyangugu twahaturiye Igitambo cy’Ukaristiya.Baganirijwe kandi   na Padiri Omoniye w’urubyiruko ku rwego rw’igihugu Padiri Léonard MUNYANGAJU ari kumwe na  Padiri Prospère Omoniye w’urubyiruko i KABGAYI ndetse na Padiri Sylvère Vicaire Épiscopale. Nyuma y’iki kiganiro urubyiruko rwerekereje kuri Bazilika ya Kabgayi aho bagiye gusuhuza Umwepiskopi wa Diyosezi ya  KABGAYI Nyiricyubahiro Mgr Smalagde MBONYINTEGE.

Padiri Emmanuel UWINGABIRE

Omoniye w’urubyiruko muri Diyosezi ya Cyangugu