Kwiyambaza Bikira Mariya Umwamikazi wa LOURDES

Amasengesho yakorwa mu misi icyenda (Noveni)

Ku Izina ry’Imana Data na Mwana na Roho Mutagatifu, amina

Indirimbo ya Bikira Mariya

Isengesho ryo kwicuza ibyaha
Isengesho rya Roho Mutagatifu
Mwami w’Ijuru, Wowe Muhoza, Roho nziza y’Ukuri ;
Wowe ubera hose rimwe ukahasendera,
Nyiribintu Wowe ugaba ubuzima ngwino uture muri twe, udusukure utwezeho icyasha cyose maze uramire roho zacu kuko wuje ubuntu.

Gusoma Ijambo ry’Imana (Ivanjiri y’umunsi)
Isengesho rya Buri munsi


Mwamikazi wa Lurude, mu rukundo rwawe rwa kibyeyi, wahishuriye Berenadeta Mutagatifu izina ryawe, ugira uti “Ndi Utasamanywe icyaha”.
Iryo zina ryoroheje riduhamagarira kukwizera rikanatwongerera intege. Mariya, Mubyeyi wanjye utuza, nizera ntashidikanya ko ufite ububasha bwo kunsabira kuri Nyagasani. Mariya mwiza, Mwamikazi w’i Lurude, Wowe Utasamanywe icyaha, mbera umutabazi, kandi unsabire ku Mana Data uri mu ijuru, ngo abigiriye Umwana wawe Yezu, ampe inema nsaba …. (Gutura isengesho bwite)


Isengesho ryiyambaza Bikira Mariya w’i Lourdes (Papa Benedigito wa XVI, i Lurude)

Bikira Mariya wiyeretse Berenadeta mu isenga ryo mu rutare.
Mu butita n’umwijima w’itumba rikaze, wamubaye hafi bimurinda imbeho, ubwiza n’urumuli wazanye bimususurutsa umutima.
Aho buzima bwacu bugerwa mu icuraburindi naho isi ikorama mu manga y’icyaha, uradusabire Ukwiringira Imana guhamye !
Wowe utarasamanywe icyaha, tebuka udutabare turi abanyabyaha. Dutoze guca bugufi duhindukirire Imana, uduhe n’ubutwari bwo kurekana n’ikibi tukagihongerera. Twigishe gusenga twingingira abandi n’abatabikozwa.
Tuyobore utugire abagenzi bagana ku Isoko y’Ubuzima nyabuzima muri Kiliziya yawe. Dutere gusonzera Ukaristiya yo mpamba y’abagenzi ikaba ifunguro ry’Ubuzima.
Roho Mutagatifu yagukoreye ibintu by’agatangaza, maze ku bubasha bwe akuzamura hejuru kure y’ibindi biremwa agushyira iruhande rw’Imana Data, mu ikuzo ry’Umwana wawe mu buzima buzira iherezo.
Rebana impuhwe ibizazane bitugwirira mu mubiri no muri roho. Uratumurikire twese nk’icyezezi kidutambutsa mu bihe byo gupfa.
Twisunze Mutagatifu Berenadeta tukwambaza Mubyeyi Bikira Mariya, nk’abana bisanga ku mubyeyi, tugusaba kandi ngo natwe utugeze mu myumvire nk’iy’abahire. Bityo natwe duhere none tuba ku isi mu byishimo by’Ijuru, turirimbane nawe Magnificat !
Habwa ikuzo Bikira Mariya, wabereye Nyagasani umuja muhire, Umubyeyi w’Imana n’Ingoro ya Roho Mutagatifu. Amina
🙏🏿Dawe uri mu Ijuru …
🙏🏿Hubahwe Imana Data …
🙏🏿Bikira Mariya Mwamikazi w’i Lurude, udusabire
🙏🏿Berenadeta Mutagatifu udusabire (x3)

➕Ku Izina ry’Imana Data na Mwana na Roho Mutagatifu, amina

CODICOM Cyangugu

Categories:

Like Us On Facebook
Facebook Pagelike Widget